Италија | Поранешниот играч на Милан, Звонимир Бобан упати големи критики на адреса на Марио Балотели, вели дека напаѓачот не разбира што значи да се носи дресот на ’Росоњерите’...
Контроверзиите постојано го следат ’Супер Марио’, по промашениот пенал на дуелот со Џенова во саботата, тој одново е во центарот на медиумското внимание откако задоцни на два последователни тренинзи.
Поранешниот играч на Милан, Звонимир Бобан воопшто не е импресиониран од ваквото однесување на напаѓачот, и упати големи критики на негова адреса.
Во разговор со Sky Sport 24, тој вели дека Марио Балотели не разбира што значи да се носи дресот на Милан, и додава дека во негово време со ваквото однесување репрезентативецот на Италија ќе ’јадел’ шлаканици од поискусните играчи како Паоло Малдини.
„Ајде да престанеме да зборуваме за овој Балотели” – рече Бобан.
„Во неговиот живот тој нема направено ништо, во клубовите за кои играше седеше на клупата за резерви”.
„Тој секогаш ќе биде помал од Милан, и Милан секогаш ќе биде поголем од него”.
„Неговото апатично однесување покажува дека не може да сфати одредени работи, не разбира што значи да се носи дресот на Милан”.
„Треба да учи од Кака, момче кое ја има освоено Лигата на Шампионите, Светско Првенство и ’Златната Топка’. Тој е многу побогат од Балотели, но и покрај тоа постојано трча и работи како дете”.
„Во мојот Милан, тој сигурно ќе ги носеше торбите на играчи како Марко ван Бастен, Жорж Веа и Андриј Шевченко”.
„Како може играч два дена по ред да закасни на тренинг? Во мое време, за вакво однесување ќе ’јадеше’ шлаканици од играчи како Паоло Малдини, Марсел Десаи, Себастиано Роси, Алесандро Костакурта и Франко Барези”.
Извор: 24FUDBAL.com.mk
