МЕНИ

Германија | Плејмејкерот на Шалке, Јулиан Дракслер вели дека нема да го напушти клубот од Гелзенкирхен во зимскиот преоден рок, но ќе размисли за својата иднина по крајот на сезоната...

20 годишниот репрезентативец на ’Панцирите’ важи за еден од најталентираните млади играчи на ’Стариот континент’, и подолго време е следен од гигантите ширум Европа.

Изминатово лето тој имаше прилика да замине од Шалке, на негова адреса пристигнаа неколку примамливи понуди, но Јулиан Дракслер реши да остане и да стави потпис на нов договор.

Во пресрет на зимскиот преоден рок, медиумите одново шпекулираат за иднината на фудбалерот, но самиот Дракслер вели дека нема шанси да замине од Фелтинс Арена во јануари.

„Нема шанси да направам трансфер во јануари” – рече Дракслер, кој се поврзува со Манчестер Јунајтед, Челзи, Арсенал, Манчестер Сити и Реал Мадрид.

„За мене многу е важно да играм речиси на секој натпревар, и во Шалке го имам тоа”.

„Секое лето морам да ги разгледам сите опции и да видам што е најдобро за мене, па летоска одново ќе го сторам тоа. Ќе видиме што ќе се случи”.

Дракслер исто така открива дека разговарал со Пер Мертесакер и Месут Озил за Арсенал, но додава дека тоа не значи дека ќе заврши на Емирати Стадионот.

„Секогаш велев дека тимовите од Англија се многу големи клубови и Арсенал секако е еден од нив”.

„Разговарам со Месут и Пер за тимот, за клубот, и тие имаат само добри зборови”.

„Никогаш не знаете што ќе се случи во летниот преоден рок, но Арсенал е многу, многу добар тим”.

„Секогаш имаат млади играчи, играат офанзивен фудбал и ми се допаѓа тоа”.

„Но подобро да не зборувам премногу на оваа тема бидејќи медиумите веднаш ќе пренесат дека сакам да играм за Арсенал, мислам дека лидерите на Шалке нема да сакаат да го слушнат тоа”.