МЕНИ

Приказната за семејството Бабунски е една од главните денешни стории на официјалниот сајт на УЕФА...

Во петокот бевме сведоци на историски момент, браќата Давид и Дориан Бабунски, беа предводени од нивниот тактко Бобан во настап за селекцијата на Македонија до 21 година.

Момент кој беше забележан од повеќе шпански медиуми, но денес и uefa.com посвети сторија за македонското трио.

„Фудбалот прави неверојатни работи, нели?" - изјавил Давид Бабунски.

„Пред неколку години, фудбалот беше причината поради која се разделивме како семејство, но сега фудбалот е причината поради која повторно сме заедно, многу сме среќни поради тоа".

Давид и Дориан своите фудбалски почетоци ги имаа во екипата на Граменет, од каде се преселија во Корнелиа, потоа Давид замина во Барселона, а Дориан во лутиот ривал Реал Мадрид. Во меѓувреме Бобан се врати во Македонија за да ја започне својата тренерска кариера. На дуелот против Азербејџан, семејството се обедини.

„Растејќи како дете, од секогаш сонував да играм заедно со мојот брат за нашата земја, а нашиот татко да ни биде селектор. Среќен сум што тој сон стана реалност" - изјавил Дориан.

Бобан Бабунски знаел дека превзема голем ризик повикувајќи ги своите синови да играат заедно за репрезентацијата, но крајот тоа се исплатеше.

„Кога ги повикав Давид и Дориан за натпреварите против Азербејџан и Норвешка, знаев дека превземам голем ризик, но на крајот бев задоволен од играта на целиот тим, вклучувајќи ги и моите синови" - вели Бобан Бабунски.

„Не бев во можност да ги следам сите нивни натпревари за нивните клубови, па пријатно бев изненаден од нивната игра против Азербејџан".

Постои можност Давид и Дориан Бабунски да настапат на Ел Класико во различни тимови, Бобан за ништо во светот не би го пропуштил тој историски момент.

„Се прашував како би реагирал ако се случи тоа. Како нивни татко нема да ми биде важно кој ќе победи а кој ќе изгуби, ќе сакам само двајцата да го дадат својот максимум на теренот, како што секогаш го прават тоа".