Германија | Јирген Клоп ја продолжи верноста кон ’Милионерите’, стратегот попладнево стави потпис на нов договор со трајност до јуни 2018...

Јирген Клоп важи за еден од најдобрите млади тренери на ’Стариот континент’ и со успехот што им го донесе на ’Милионерите’ во изминативе години, го привлече вниманието на неколку клубови од Премиер лигата.

Неговото име исто така се споменуваше и со селекторското столче на Германија доколку Јоаким Лев реши да се повлече од кормилото на ’Панцирите’.

Сепак, стратегот останува на Сигнал Идуна Парк и својата посветеност  кон проектот на ’Милионерите’ ја потврди со нов договор.

„Борусија Дортмунд денеска го продолжи договорот на тренерот Јирген Клоп до 30. јуни 2018” – гласеше соопштението на вице-шампионот на Европа.

Нови договори добија и неговите помошници, Жељко Буваќ и Петер Кравиц.

 „Ја цениме довербата што Борусија Дортмунд ни ја укажа” – рече стратегот „Сеуште сме заљубени во овој клуб и начинот на кои се водат работите тука”.

„Минатата година во Европа бевме некаде на 28. место кога е во прашање буџетот на тимот, но сепак успеавме да стигнеме до финалето од Лигата на Шампионите”.

„Тоа е знак дека тука креираме нешто брилијантно. Па сите сме задоволни што сме во можност да му помогнеме на тимот, кој има уште многу да учи и да забележи голем прогрес”.

Тој потоа додаде: „Чест ми е што некои големи клубови ја ценат мојата работа во Дортмунд, но јас не сум тип на човек кој се прашува дали тревата е позелена на друго место”.

„Според мене, важно е да се биде на право место во право место, и Дортмунд е правото место”.

„На клубовите кои пројавуваат интерес за мене би им кажал дека сум поласкан од нивниот интерес, но имам договор со Дортмунд до 2018 и нема потреба да ми се јавуваат до тогаш”.

„Планирам во целост да го испочитувам договорот, и покај тоа што ова може да звучи изненадувачки за некои луѓе”.

Доколку во целост го одработи новиот договор, Јирген Клоп на кормилото на Борусија Дортмунд ќе помине 10 години.

Извор: 24FUDBAL.com.mk