Лига на Шампиони | Антонио Конте жали што Јувентус поразен заминува од Мадрид, но вели дека е задоволен од перформансите на неговите избраници кои покажале дека можат да се носат со Реал...
’Старата Дама’ во Торино се враќа со празни раце, и покрај тоа што одигра добро и во поголемиот дел од средбата беше рамноправен противник.
Антонио Конте е задоволен од она што го видел на Сантијаго Бернабеу, стратегот верува дека Јувентус одиграл на нивото на Реал, но поради ситни грешки и сомнителни одлуки на судиите, ’Кралевите’ на крајот славеле.
„Ја променивме формацијата во 4-3-3, игравме со четворица во одбрана бидејќи Реал Мадрид е многу силен по крилните позиции“ – рече тренерот на Јувентус.
„Моите играчи одлично го познаваат овој систем и покрај тоа што долго време играме со тројца во одбраната”.
„Го употребивме Клаудио Маркисио на десното крило и се обидовме да внесеме цврстина во одбраната со Мартин Касерес, бидејќи знаеме колку Реал е опасен при контра нападите”.
„Одигравме агресивно. Кога го напаѓате Реал, морате да бидете агресивни и фокусирани, во спротивно ќе го изгубите поседот на топката и ќе оставите отворен простор за играчи како Кристијано Роналдо и Анхел Ди Мариа, а тоа е самоубиство”.
„Мислам дека Реал имаше големи проблеми”.
„Ми се допадна начинот на кои моите избраници одиграа. Покажавме дека можеме да играме на ова ниво доколку навистина сакаме. Вечерва загубивме само поради ситни детали и сомнителни судиски одлуки кои не беа во наша полза”.
„Игравме на нивото на Реал Мадрид и можевме да победиме. Покажавме дека можеме да играме против било кој противник”.
„Минатата година бевме надиграни од Баерн, додека пак сега одигравме одличен натпревар против тим, кој горе-долу е на истото ниво како шампионот на Европа”.
„Па мислам дека не сме во криза како што многумина велат”.
Јувентус сега е во малку непријатна позиција во борбата за второто место во групата, но Конте е убеден дека тие ќе обезбедат пласман во нок-аут фазата.
„Ситуацијата е тешка, но доколку играме како што игравме против Реал, сигурен сум дека можеме да го надополниме изгубеното и да се пласираме во следната рунда”.
Извор: 24FUDBAL.com.mk
