Италија | Рома со 2-0 славеше над Наполи на Олимпико и го продолжи перфектниот старт на сезоната од осум победи по ред, Горан Пандев пропушти фантастична можност да му донесе водство на неговиот тим...

Со два погодоци Миралем Пјаниќ беше херојот на Римската Волчица во дерби натпреварот против Наполи кој го добија домаќините со 2-0.

При резултат од 0-0 Наполи пропушти две фантастични шанси да дојде во водство.

Најпрво по асистенција од Инсиње, Горан Пандев се најде сам пред голманот на Рома, но не успеа да погоди.

Подоцна во обратна улога се најдоа двајцата фудбалери на Наполи, Пандев асистираше до Инсиње но и тој не успеа да го совлада Де Санктис.

Казната за промашувањата дојде пред крајот на првото полувреме кога Пјаниќ постигна прекрасен гол од слободен удар за водство на Рома од 1-0.

Во 70. минута Канаваро направи прекршок за пенал и доби директен црвен картон, Пјаниќ го реализираше ударот од белата точка и ги реши сите дилеми околу победникот.

Македонскиот фудбалер настапи до 68. минута кога на негово место влезе Игуаин.

Рома има старт од соништата, осум победи од осум натпревари со гол разлика од 22:1.

Извор: 24FUDBAL.com.mk