Англија | Претседателот на Ливерпул, Том Вернер вели дека Луис Суарез е интегрален дел од иднината на клубот и верува дека напаѓачот ќе ги инспирира ’Црвените’ до место во Лигата на Шампионите...
Летоска, репрезентативецот на Уругвај во неколку интервјуа истакна дека сака да замине од Енфилд.
Но Ливерпул одби две понуди од Арсенал, и стави јасно до знаење дека нема намера да го продаде 26 годишниот напаѓач.
Откако ја одработи суспензијата од 10 натпревари, Луис Суарез повторно е стартер во тимот на Брендон Роџерс, и покажа импресивни перформанси на дуелите со Сандерленд и Кристал Палас.
Претседателот на ’Црвените’, Том Вернер има многу пофални зборови за проблематичниот напаѓач, и верува дека Луис Суарез може да го инспирира Ливерпул до место во Лигата на Шампионите.
„Во летото неколку клубови пројавија интерес за неговите услуги но за нас беше важно да го задржиме” – рече Том Вернер.
„Тој е еден од најдобрите играчи во светот, и верувавме дека ќе бидеме посилен клуб со него отколку без него”.
„Ова не значи дека не ја почитувам неговата желба да игра во Лигата на Шампионите. Но ќе биде прекрасно доколку во мај завршиме во топ четири на табелата, да обезбедиме настап во Лигата на Шампионите и тој да биде дел од сето тоа”.
„Нашата намера е да го задржиме во годините што претстојат. Сакаме да изградиме победнички тим и тој е интегрален дел од тоа”.
„Минатото е минато, и јас лично имам голема наклонетост кон него”.
Извор: 24FUDBAL.com.mk
