Лига на Шампиони | Арсен Венгер вели дека уживал во триумфот од 2-0 над ’Наполитанците’ и упати многу пофални зборови за Месут Озил...

Во пресрет на натпреварот, двете екипи беа во извонредна форма, но гостите од Италија не успеаа да му пружат силен отпор на Арсенал.
 
Избраниците на Арсен Венгер одлично ја започнаа средбата, и со головите на Озил и Жиру стигнаа до предност од 2-0 по само 15 минути игра.
 
„Секако дека сум задоволен од перформансите” – рече менаџерот на Арсенал по крајот на дуелот. „Навистина уживав вечерва, бевме фантастични во првото полувреме”.
 
„Имавме одлично темпо, одлични движења и одлична завршница на нападите. Во глобала, тоа е играта што сакаме да ја видиме”.
 
„Во вториот дел ја смиривме играта, бевме претпазливи и повеќе бевме фокусирани на тоа да не примиме гол отколку да постигнеме”.
 
„Но сигурен сум дека можевме да постигнеме трет погодок доколку притисневме силно”.
 
За играта на рекордното засилување Месут Озил, Арсен Венгер рече: „Мислам дека тој имаше извонредно прво полувреме”.
 
„Понуди се што се очекува од фантастичен играч: тимска работа, вештини, додавања и удари кон голот. Па ви преостанува само да седите и да уживате”.
 
„Морам да признам дека ја обожавав неговата игура уште во времето кога беше дел од Реал Мадрид. Среќни сме што го ангажиравме”.
 
„Групата изгледа прилично тесна бидејќи Дортмунд победи, па клучен натпревар ќе биде веројатно следниот кога се среќаваме со ’Милионерите’”.

Извор: 24FUDBAL.com.mk