Шпанија | Агентот на Герет Бејл, Џонатан Барнет вели дека во летниот преоден рок клуб понудил многу повеќе пари за Велшанецот од Реал Мадрид...

Герет Бејл во последните денови од летниот трансфер период се пресели на Сантијаго Бернабеу во зделка вредна рекордни 100 милиони евра.
 
Претседателот на ’Кралевите’, Флорентино Перез вчера соопшти дека Тотенхем во прв момент одбил да го продаде играчот.
 
Но Реал Мадрид реагирал само откако Манчестер Јунајтед доставил понуда, и на крајот клучен се покажал детскиот сон на Бејл да игра за ’Кралевите’.
 
Агентот на Велшанецот, Џонатан Барнет за емисијата Jugones потврди дека втор клуб доставил понуда која била многу побогата од онаа на Реал Мадрид, но не го откри името на клубот.
 
Тој исто така истакна дека зделката била блиску до пропаѓање и преговорите биле тешки.
 
„Трансферот на Бејл беше блиску до пропаѓање” – рече Барнет. „Тотенхем се обиде да го задржи Бејл. Средбите не беа секогаш мирни и пријателски, некои состаноци беа непријатни со многу несогласувања”.
 
„На Бејл му беа потребни неколку слободни дена, па побара дозвола од Тотенхем да отпатува (во Марбеља). Играчот не зборуваше со никого, не се гледаше со никого”.
 
„Медиумите од Шпанија не разбраа зошто Тотенхем не сака да даде зелено светло кога беше понудена толкава сума, но доколку на Тотенхем му беа потребни пари, зделката ќе се реализираше уште првиот ден”.
 
„Исто така, имаше клуб кој понуди повеќе пари од Реал Мадрид. Многу повеќе пари”.
 
Денешното издание на The Sun вели дека Манчестер Јунајтед понудил фантастични 120 милиони фунти, додека пак Daily Mirror објави дека ’Црвените Ѓаволи’ биле спремни да платат 100 милиони фунти со цел да го украдат Герет Бејл пред носот на Реал Мадрид.
 
Барнет исто така верува дека неговиот клиент е подобар од големото летно засилување на Барселона, Нејмар.
 
„Бејл играше во Премиер лигата и освои многу награди. Според мене, тој е подобар од Нејмар”.

Извор: 24FUDBAL.com.mk