Англија | Асистентот на Жозе Мурињо, Стив Холанд го советува Хуан Мата да му верува на ’Специјалниот’ и на тој начин да стане подобар фудбалер...

Откако Португалецот беше именуван за нов менаџер на Челзи, медиумите почнаа да говорат дека Жозе Мурињо не е фан на играта на Хуан Мата.
 
Ваквите стории се покажаа како точни на стартот од новата сезона, репрезентативецот на Шпанија не е стартер а на дуелот со Фулам во саботата не се најде ниту на клупата за резерви.
 
’Специјалниот’ се обидува да го промени стилот на игра на ’Сините’, Оскар е неговиот број 10, а Мата ќе мора да игра по крилните позиции и да помага во одбраната.
 
Асистентот на Жозе Мурињо, Стив Холанд го советува плејмејкерот да биде трпелив, да му верува на менаџерот и на тој начин да стане подобар фудбалер.
 
Тој за пример го посочи Кристијано Роналдо, кој забележал напредок во играта под водство на Жозе Мурињо.
 
„Мурињо секој ден ги притиска играчите да го дадат својот максимум” – рече Холанд.
 
„Тој го правеше тоа во секој клуб каде што работеше, не само во Челзи”.
 
„Доколку ја погледнете соработката на Жозе со Роналдо изминатите три години, тој навистина напредна како индивидуалец”.
 
„Кристијано повеќе не е само талентиран дриблер кој спринтува со топката и дава голови”.
 
„Роналдо стана играч од топ ниво кој носи победи, кој се враќа да помогне во одбраната, трча многу и постојано е опасност по противничкиот гол”.
 
„Тоа се случи бидејќи Мурињо постојано ги притиска играчите да го дадат максимумот”.
 
„Жозе секој ден бара подобрување од секој играч, и на крајот од сето ова корист има и тимот”.
 
„Потребата да се адаптирате, фразата што ја употреби Жозе, не е ништо ново тука”.
 
„Хуан во минатото покажа дека е способен да се адаптира. Сигурен сум дека и сега ќе го стори тоа”.

Извор: 24FUDBAL.com.mk