Шпанија | Претседателот на Барселона, Сандро Росел вели дека главната ѕвезда на ’Каталонците’, Лео Меси не побарал нов подобар договор...

Изминатиов викенд Кристијано Роналдо стави потпис на нов петгодишен договор со Реал Мадрид.
 
Детали од договорот не беа откриени, различни медиуми пренесуваат за различни бројки, некои велат дека CR7 ќе заработува по 17 милиони евра годишно додека пак други известуваат за плата од 21 милион евра по сезона, но сите се согласни дека Португалецот сега е играчот со најголема плата во светот на фудбалот.
 
По ваквиот развој на настаните, беше најавено дека Лео Меси ќе побара средба со лидерите на Барселона за нов побогат договор според кој ќе биде на нивото на неговиот голем ривал Кристијано Роналдо.
 
Но од таборот на ’Каталонците’ велат дека Аргентинецот не побарал поголема плата.
 
Запрашан дали новиот договор на Роналдо ќе влијае врз ситуацијата на Меси, претседателот на Барса, Сандро Росел рече: „Во овој момент Лео не ни кажал ништо”.
 
„Тој е среќен тука и игра за најдобриот клуб во светот. Тоа што нема вести е добро за нас”.
 
Росел исто така истакна дека очекува Андрес Иниеста во скоро време да ја продолжи верноста кон Барселона.
 
„Новиот договор на Иниеста нема да биде проблем. Двете страни сакаат да ја продолжат соработката”.

Извор: 24FUDBAL.com.mk