Шпанија | По три години откако го напушти Сантијаго Бернабеу, Раул го имаше своето официјално збогување од Реал Мадрид, големата легенда на клубот на спектакуларен начин се поздрави со фановите, играчите и раководството на клубот...

Вистински спектакл се случуваше синоќа на Бернабеу, Раул се врати таму каде што припаѓа, а навивачите и раководството му оддадоа голема почит за она што тој му го даде на Реал Мадрид од 1994 до 2010 година.

Во рамките на традиционалниот Трофеј Бернабеу, синоќа гостуваше актуелниот клуб на Раул, Ал Сад од Катар.

Раул одигра едно полувреме за Реал Мадрид во кое постигна и погодок, Кралевите го добија натпреварот со 5-0.

Но, резултатот беше во втор план, Раул беше најважниот човек на теренот, ја доби капитенската лента од Икер Касиљас, а Роналдо му ја отстапи седмицата, која потоа му беше и официјално предадена од легендата.

Раководството на клубот ги извади сите трофеи на теренот кои Реал Мадрид ги освои додека Раул го носеше кралскиот дрес, а легендата доби и специјална награда од кралот на Шпанија, Хуан Карлос.

Во текот на целиот натпревар "вечниот" Раул со овации беше поздравуван од фановите на Реал Мадрид кои никогаш нема да го заборават својот миленик.

Извор: 24FUDBAL.com.mk