Македонската фудбалска репрезентација ја оправда улогата на фаворит и забележа победа во дуелот против Катар.
Публиката можеше да види две сосема различни полувремиња на овој натпревар, прво интересно исполнето со неколку можности, и досадно второ полувреме без многу прилики за гол.
Македонија тргна офанзивно, иницијативата комплетно и припаѓаше на нашата репрезентација.
Првиот возбудлив момент се случи кога Горан Попов спушти една топка до Шумуликоски кој со ножички атрактивно се обиде, но не успеа да го совлада голманот на Катар.
Стојков имаше колосална шанса, по проигрувањето на Пандев, тој излезе сам пред голманот на Катар, имаше идеална позиција, можеше и да асистира но биеше катастрофално лошо крај голот.
Следната можност беше за Ибраими кој од убава можност не успеа да реализира.
За промашените шанси следуваше казна, по една нафрлена топка од слободен удар, Муса во 25та минута постигнува гол за водство на Катар од 1-0.
Радоста на гостите траеше многу кратко, во следната минута по асистенција на Илчо Наумоски, Горан Пандев постигнува гол за израмнување на 1-1.
На пет минути до крајот, прекрасен продор на Горан Пандев, соло акција на нашиот најдобар фудбалер и убав погодок за комплетен пресврт и водство на Македонија од 2-1.
Вториот дел не ги оправда очекувањата, играта драстично се промени, со само неколку шанси за погодок.
Пандев ја имаше најсериозната, влезе во убава позиција со освртување, биеше но голманот на Катар го одбрани неговиот удар.
Последната шанса ја имаше Филип Ивановски, но не реагираше најдобро, и пропадна и таа можност за зголемување на водството.
Победа на македонската репрезентација која можеше да биде изразена и со поголема гол разлика.
За Македонија настапија: Пачовски, Лазаревски, Митрески, Новески, Г. Попов, Деспотовски, Шумуликоски, Пандев, Стојков, Наумоски, Ибраими Од клупата влегоа: Р.Попов, Мојсов, Седлоски, Савиќ, Алими, Ивановски и Нурединоски.
Powered by: 24 FUDBAL.com.mk
