Шпанија | Претседателот на Реал Мадрид, Флорентино Перез остро гo демантираше написот во Marca дека капитените на тимот побарале Мурињо да го напушти кормилото на Кралскиот клуб...

Во денешното издание Marca излезе со информација дека Касиљас и Рамос имале состанок со Флорентино Перез на кој му дале ултиматум, доколку Мурињо не замине во летниот преоден рок, тие ќе го напуштат Реал Мадрид.
 
По тој повод Флорентино Перез свика прес конференција на која остро ги негираше пишувањата на шпанскиот весник.
 
„Поради сериозноста на наводите објавени од Marca го прекршив моето правило да не зборувам со новинарите за дневните активности на клубот" - изјави Перез на прес конференцијата.
 
„Не сум тука да зборувам за Икер, туку само да ги негирам информациите кои излегоа утринава. Не сум зборувал со Мурињо, дојдов тука по свое убедување. Новинарите на Marca не можат да си играат со институција како што е Реал Мадрид".
 
„Апсолутно нема никаква вистина во тоа дека капитените рекле било што негативно за тренерот. Никаков ултиматум не е поставен од Касиљас и Рамос. Нивото на одговорност на капитените не кореспондира со информациите кои ги пласира Marca".
 
„Информацијата пласирана денес е чиста лага и е сериозен напад врз клубот. Имам голема почит кон новинарите и секогаш ги слушам нивните критики, без разлика дали мислам дека се исправни или не".
 
„Но постојат граници кои мора да се почитуваат. Ова е сериозна работа. Не е типична дневна шпекулација за тоа кој играч ќе го купиме или кој нема. Се работи за етика".