МЕНИ

Поранешниот претседател на Македонија Ѓорче Петров, Благоја Николовски ја објави кандидатурата за претседател на фудбалската федерација на Македонија.

Благоја Николовски денеска на прес конференција пред медиумите ја презентираше програмата со која ќе се обиде да го урне актуелниот претседател на ФФМ, Харалампие Хаџи-Ристески.

Николовски најави нова визија за организација на фудбалската федерација на Македонија, ставајќи го акцентот на чесно и транспарентно раководење со "куќата на фудбалот".

Како еден од клучните делови на програмата на Николовски е формирањето на здрженија на прволигаши и второлигаши кои би функционирале со свој статут, тела и органи, основачи би биле самите клубови кои ќе се натпреваруваат во лигите.

Сите клубови кои треба да се натпреваруваат во Првата македонска лига ќе треба да го спроведат клубскиот лиценцен систем согласно со актите на ФФМ и УЕФА без разлика дали ќе учествуваат во европските натпреварувања или само во домашното првенство.

Николовски најави и реформи во судиската организација која би требала да се приближи до европските стандарди на судење.

Посебен приоритет за Николовски ќе биде младинскиот фудбал кој според него е базата за сите успеси на македонскиот фудбал во иднина.

Николовски најави подобрување на условите за младите категории, посебен финансиски фонд за младинскиот фудбал, изградба на мини спортски терени за тренинг, нов систем за натпреварување, награди и стимулации за фудбалерите и тренерите во младинските категории.

Фудбалската федерација на Македонија би била отворена кон јавноста со редовни месечни прес конференции и отчет за сработените проекти.

Според однапред утврдени критериуми сите клубови би имале еднаква можност да аплицираат за финансиите добиени од ФИФА и УЕФА за разни проекти.

Сеуште нема конкретен датум за изборното Собрание на ФФМ, но се очекува тоа да се случи до крајот на годината.

Клучно за добивање на претседателските избори ќе биде лобирањето кај делегатите чии гласови го одлучуваат победникот.

Благоја Николовски најави запознавање на делегатите со својата програма, за сега тој има поддршка од пет делегати кои се дел од Општинскиот фудбалски сојуз Скопје и кои ја поддржале неговата кандидатура.