Италија | Потпретседателот на Милан, Адриано Галијани вели дека Александре Пато сака само да игра, а не да замине од Сан Сиро...

Бразилскиот репрезентативец минатата недела истакна дека не е задоволен од малата минутажа што ја добива, и најави дека ќе разговара со неговиот агент.
 
Медиумите го протолкуваа ова како желба на Александре Пато да замине од Милан, и го поврзаа напаѓачот со трансфер во зимскиот преоден рок.
 
Се споменуваат имињата на ПСЖ и Коринтијанс како можна нова дестинација на Пато, но ваквите стории ги отфрла потпретседателот на Милан, Адриано Галијани.
 
„Пато, речиси како и сите други фудбалери, сака да игра” – рече Галијани во интервју за RMC.
 
„Неговата ситуација не е како онаа на Касано”.
 
„Пато никогаш не побара трансфер, додека пак Касано ме бомбардираше со СМС пораки”.
 
„На мене и тренерот Алегри постојано ни пишуваше дека сака да замине”.
 
Запрашан дали Милан ќе се засили во јануари, Галијани одговори: „Во моментов во составот имаме 30-32 фудбалери”.
 
„Па најпрво ќе мораме да продадеме неколку играчи. Кога ќе го редуцираме составот, ќе ангажираме некого”.
 
„Има неколку фудбалери кои сакаат да заминат. Има неколку фудбалери кои ние сакаме да ги продадеме, но тие не прифаќаат нова дестинација бидејќи се среќни во Милано”.
 
Запрашан за трансферот на Златан Ибрахимовиќ во ПСЖ, потпретседателот на Милан рече: „Воопшто не ми беше лесно да го продадам Ибра. Сепак, економската состојба во Италија е лоша. Ибра беше луксуз од кој моравме да се откажеме”.
 
„Доколку Ибра останеше, можеби Ел Шарафи немаше да игра во ваква извонредна форма. Немам доказ за оваа теорија, но вакво е моето мислење”.