Шпанија | Кака вели дека сака да остане во Реал Мадрид и потенцира дека никогаш не помислил да замине од Кралскиот клуб...

Во летниот преоден рок често се зборуваше за заминување на Кака од Сантијаго Бернабеу, но Бразилецот остана во Реал Мадрид.
 
Синоќа, во куп натпреварот против Алкојано, Кака ја носеше капитенската лента, а настапот го зачини и со погодок.
 
Поранешниот добитник на Златната Топка, вели дека никогаш не помислувал да го напушти Реал Мадрид, неговата желба е да се бори за место во тимот и да освојува трофеи со Кралскиот клуб.
 
„Дури и кога премногу се зборуваше за трансфер, во летниот преоден рок, јас не размислував за заминување, бев сигурен дека можам уште многу да му дадам на Реал Мадрид" - вели Кака.
 
„Имам уште три години од договорот и мислам дека можам да дадам придонес. Сакам да останам во Реал Мадрид, да изборам место во тимот и да освојувам титули".
 
30-годишниот фудбалер беше запрашан и дали планира да се врати во Бразил.
 
„Не планирам во брзо време да се вратам во Бразил, но доколку се вратам секако дека приоритет ќе има Сао Пауло".