Англија | Според агентот на ФИФА, Франсоа Гаљардо, Џон Тери сака да замине од Челзи, дефанзивецот веќе е во преговори со Валенсија...

Капитенот на Челзи во моментов ја одработува суспензијата од четири натпревари што му ја изрече ФА, откако дефанзивецот беше прогласен за виновен по обвинувањата дека упатил навреда на расна основа кон Антон Фердинанд од КПР.
 
Агентот на ФИФА, Франсоа Гаљардо во интервју за Radio Intereconomia октрива дека Валенсија посакува да го ангажира Џон Тери во јануари, а самиот фудбалер бил отворен за преселба на Местаља.
 
„Валенсија е во преговори, јас лично сум инволвиран, за трансфер во зимскиот преоден рок” – рече Гаљардо.
 
„Понудата е доставена. Фудбалерот е под договор до јуни, и нема да го обнови поради неколку причини. Тој сака да дојде во Шпанија”.
 
Гаљардо верува дека неодамнешните контроверзии го принудиле дефанзивецот да ја заврши кариерата во друг клуб, а не во Челзи.
 
„Тери има проблеми. Го навредуваат и тој повеќе не сака да го трпи тоа. Самиот побара да замине”.
 
„Преговорите се водат веќе 15 дена, беа одржани две средби”.
 
„Понудата е на маса, се работи за 18 месечен договор со опција за додатни 12 месеци“.
 
„Мислам дека ќе прифати”.
 
Во ваквата сторија има определени недоследности, со оглед на тоа дека Џон Тери е под договор со Челзи до 2014, а не до 2013 како што посочува Гаљардо.