Лига на Шампиони | Жозе Мурињо вели дека не треба да се прави драма од поразот во Дортмунд, Реал Мадрид е во добра позиција за пласман во следната фаза...

Реал Мадрид синоќа загуби на гостувањето кај Борусија Дортмунд и падна на втората позиција на табелата.
 
Но од трите последни натпревари, Кралевите играат два на Сантијаго Бернабеу, па Жозе Мурињо вели дека нема простор за паника.
 
„Го загубивме натпреварот и не сме задоволни, но да не правиме драма од тоа. Второ место сме. Сите знаат дека има групи кои се шега, но нашата е најтешката" - изјави Мурињо по натпреварот.
 
„Од оваа група голем тим ќе оди во Лига Европа и добар тим ќе биде елиминиран. Групата е навистина тешка. Ние сме во добра позиција за да одиме понатаму. Доколку победиме на двата натпревари кои ги играме дома сигурно ќе се пласираме во следната рунда".
 
„Натпреварот беше тежок, ситни работи го одлучуваа, теренот изгледа добро од далеку, но е тежок за игра. Ова беше дуел со неколку шанси и малку креативност".
 
„На полувремето им реков на фудбалерите, доколку дадеме гол ќе победиме, доколку примиме ќе загубиме. Тие погодија".