Шпанија | Жозе Мурињо вели дека Реал Мадрид е шампион на Шпанија а Челзи шампион на Европа, па нема потреба да се зборува за Барселона...

’Каталонците’ доминираат на фудбалската сцена во последните неколку години, а со офанзивната игра која ја негуваат, добиваат голем број на пофални зборови.

 
Во интервју за France Football, Жозе Мурињо вели дека е време помалку да се зборува за Барса, и додава дека тој ја преферира филозофијата на Реал Мадрид.

 
„Мислам дека дојде време помалку да зборуваме за Барселона” – рече тренерот на Реал Мадрид.

 
„Зошто да зборуваме за Барса? Реал Мадрид е шампион на Шпанија, а Челзи е шампион на Европа. Тие не се ниту едното ниту другото”.

 
„Барселона освои многу титули и ќе продолжи да го прави тоа во иднина. Сепак, јас ја преферирам филозофијата на Реал Мадрид. Минатата сезона бевме многу ефикасни, а игравме и на импресивно ниво”.

 
„Игравме убав и спектакуларен фудбал. Уживам во стилот на игра на Реал Мадрид. Нема човек што може да ме убеди дека еден стил на игра е поатрактивен од друг”.

 
„Некои велат дека уживаат во стилот на игра на Барса, други велат дека не уживаат. Ја почитувам нивната филозофија и морам да признaам дека е тешко да се игра против нив”.

 
„Некои тимови се обидуваат да го копираат она што некој го гледа како идеално. Мадрид има свој сопствен идентитет”.

 
Мурињо исто така проговори и за ’Златната Топка’, Португалецот верува дека неговиот сонародник, Кристијано Роналдо ја заслужува оваа награда.

„Меси и Кристијано се на едно повиско ниво од сите преостанати“.

 
„Да не се шегуваме, ’Златната Топка’ треба да му се додели или на Меси или на Роналдо”.

 
„Сепак, доколку овие двајца се на исто ниво, како е можно Меси да има четири а Кристијано само една?”

 
„Покрај тоа, Роналдо ја освои Ла Лига и сруши неколку рекорди. Додатно, тој стигна и до полу-финале на ЕВРО 2012 со репрезентација која никој не очекуваше да направи нешто такво”.

 
„Доколку Меси ја освои ’Златната Топка’, ќе го почитувам тоа и нема да кажам ништо”.

 
Мурињо потоа проговори и за ПСЖ, и обидот на Катарците да направат топ тим од ’Светците’.

 
„Лисабон, Лондон, Мадрид, Милано... Речиси сите големи градови имаат одличен тим, но Париз сеуште не е на оваа листа”.

 
„ПСЖ сеуште не е одличен тим. Тие се добар тим со одлични фудбалери. Доколку ме прашате дали тие заслужуваат да триумфираат во Лигата на Шампионите оваа сезона, ќе кажам не”.

 
„Иднината? Последниот пат кога ме прашаа за ПСЖ, реков дека тие имаат добар тренер и не им е потребен Мурињо”.

 
„Ми се допаѓа онаму каде што сум, во Мадрид”.