Шпанија | Лука Модриќ не го крие задоволството по потпишувањето за Реал Мадрид, вели дека е горд што ќе го носи дресот на најголемиот клуб во светот и очекува да освои многу титули со Кралскиот клуб...

Откако утринава Реал Мадрид и Тотенхем соопштија дека го договориле трансферот на Лука Модриќ, попладнево фудбалерот успешно ги помина медицинските тестови и стави потпис на пет годишен договор со Кралскиот клуб.
 
Со ова заврши трансфер сагата на Модриќ, а Хрватот е пресреќен што ќе игра за Реал Мадрид, ветува дека ќе даде се од себе со цел да му помогне на тимот да освојува титули.
 
"Трансферот беше долг процес, но на крајот дојдов тука и многу сум среќен поради тоа. Чест и гордост ми е што сум во најголемиот клуб во светот. Возбуден сум и со нетрпение чекам да почнам да тренирам и да играм" - изјави Лука Модриќ на својата прва прес конференција како фудбалер на Реал Мадрид.
 
Запрашан на која позиција сака да игра, Модриќ одговори:
 
"За мојот тренер во претходниот клуб, играв на сите позиции во средниот ред. Мурињо ќе одлучи, а јас ќе играм каде што тој ќе каже, ќе дадам се од себе за тимот, со цел да му помогнам да дојде до резултати и титули".
 
"Сезоната ја стартувавме лошо, но не е важно како ќе се почне, важно е како ќе се заврши. Има уште многу натпревари, има време".
 
"Имав потешкотии, речиси еден месец не тренирав со тимот. Но како што кажав, среќен сум што сум тука, ова е голем предизвик за мене".
 
"Тука имам се што ми е потребно, го имам најдобриот тренер и најдобрите играчи".
 
Во среда Реал Мадрид игра против Барселона во реваншот од Суперкупот на Шпанија.
 
"Се чувствувам добро, треба да тренирам со тимот, да контактирам со фудбалерите, но подготвен сум. Тренерот ќе одлучи дали ќе играм во среда".
 
"Мојата лична цел е да изборам место во првиот тим на Реал Мадрид, за тоа да се случи ќе мора да работам напорно. Ќе биде тешко, но подготвен сум".
 
"Дојдов да играм фудбал, да напредувам како играч и да освојувам титули со Реал Мадрид, Ла Лига, Лигата на Шампионите и Купот се моите предизвици".
 
Модриќ беше запрашан и за неговите идоли од детството.
 
"Бев инспириран од Бобан кој играше за Милан. Тој беше еден од најдобрите фудбалери на Хрватска. Го сакав и Тоти од Рома".