Шпанија | Според пишувањата на AS, Кун Агуеро е целта број еден на Реал Мадрид и веќе се кројат стратегии како напаѓачот да пристигне на Сантијаго Бернабеу...

Аргентинецот и минатото лето се поврзуваше со Реал Мадрид, но тогаш Атлетико Мадрид категорично застана на ставот дека нема да дозволат Агуеро да се пресели во лутиот градски ривал.
 
’Јорганџиите’ тогаш ја прифатија понудата на Манчестер Сити вредна 45 милиони евра, и напаѓачот се пресели во Премиерлигата.
 
Но според денешното издание на AS, Кун Агуеро би можел да се врати во Мадрид по само една година помината на ’Островото’.
 
Весникот вели дека Агуеро е цел број еден на Реал Мадрид, и Кралевите веќе кројат планови како да го донесат фудбалерот на Сантијаго Бернабеу.
 
Се говори дека Жозе Мурињо дал зелено светло за зделка во која Гонзало Игуаин ќе биде понуден на ’Граѓаните’ како и 5 до 10 милиони евра во кеш.
 
Извештајот вели дека Агуеро неколку месеци знае за желбата на Реал Мадрид, и веќе дискутирал на оваа тема со некои од неговите соиграчи.
 
AS вели дека самиот фудбалер е привлечен од идејата да се врати во Мадрид, бидејќи како и многу други Јужноамериканци, не може да се прилагоди на животот во Англија.
 
Пред еден месец на оваа тема се огласи и Диего Марадона, кој истакна дека неговиот зет мора да игра за Реал Мадрид.
 
“Кун мора да игра за Реал Мадрид.” – рече Марадона за Radio La Red. “Тој погреши кога го одбра Манчестер Сити, требаше да остане во Мадрид.”