Лига на Шампиони | Тренерот на Баерн Минхен, Јуп Хејнкес не го крие задоволството од победата на Велодром, но вели дека треба да се одигра и натпреварот на Алијанц Арената пред да почне да се мисли на Реал Мадрид...

Баерн Минхен лесно со 2-0 славеше голема победа во Марсеј со која е на чекор до полуфиналето во Лигата на Шампионите и пресметка со Реал Мадрид.
 
Јуп Хејнкес е незадоволен само од бројот на добиени жолти картони, но има пофалба за играта на неговите фудбалери.
 
"Пред натпреварот им кажав на моите фудбалери дека Марсеј е физички силен тим. Единствена работа поради која би ги критикувал моите играчи е добиените пет жолти картони, тоа е премногу за натпревар во кој победувате вака комфорно" - изјави Хејнкес по натпреварот.
 
"При првиот гол имавме многу добра акција, Лам ја зема топката, потоа имавме две три додавања во средината и финиширавме. Тоа е она што често го правиме во изминатите недели и затоа сме успешни во моментов".
 
"За вториот гол, Робен одигра одлично двојно проигрување со Томас Милер. Тоа им го кажав на полувремето, доколку крилата добијат шанса, почесто да одиграат двојни проигрувања. Робен го направи тоа прекрасно со Томас".
 
"Сеуште не можеме да зборуваме за Реал Мадрид, има уште едно полувреме во Минхен. Можам да кажам дека во Марсеј одигравме со голема самодоверба".
 
"Не е лесно да се игра на Велодром, многу тимови можат да ви го кажат тоа, па важно е што не примивме гол".
 
"Би било одлично да се сретнеме со Реам Мадрид во полуфиналето, таму имам многу пријатели (Хејнкес беше тренер на Кралевите во сезоната 1997/98)".
 
"Многу добро го познавам шпанскиот фудбал, тимот на Реал Мадрид, и знам дека нема да има фаворит во нашата пресметка. Би биле подготвени за битка со нив".