Лига на Шампиони | Реал Мадрид рутинирано со 4-1 ја победи ЦСКА Москва и со вкупни 5-2 обезбеди пласман во 1/4 финалето од Лигата на Шампионите...

Реал Мадрид рутинирано со 4-1 ја победи ЦСКА Москва и со вкупни 5-2 обезбеди пласман во 1/4 финалето од Лигата на Шампионите.
 
Жозе Мурињо е задоволен од играта на своите фудбалери, вели дека одиграле сериозен натпревар против рускиот тим.
 
"Натпреварот беше онаков каков што очекував. ЦСКА играше затворено, но беше многу опасна со четворицата офанзивни фудбалери кои беа брзи и го загрозуваа нашиот гол од контра напади" - вели Мурињо.
 
"Покрај нивните неколку шанси, ние доминиравме во текот на целиот натпревар. Не прикажавме спектакуларни перформанси, но одигравме сериозен натпревар".
 
Чаби Алонсо поради жолти картони ќе го пропушти првиот четвртфинален натпревар.
 
"Чаби Алонсо е одличен и многу значаен фудбалер за нас, но нема да плачеме поради овој жолт картон. Солидни сме во средината на теренот. Гранери и Лас можат лесно да играат со Кедира и Нури Сахин. Алонсо ќе одмори и ќе биде во можност да игра во Ла Лига".
 
"На овој натпревар Кака прикажа спектакуларни перформанси. Најдобрите години тој ги имаше во Италија, но тој никогаш не работел напорно како сега што работи. Нормално е што се почувствува замор кај него, одигра 75 минути на највисоко ниво. Изврши фантастична работа и среќен сум поради начинот на кој одигра".
 
Жозе Мурињо жали за елиминацијата на Интер, и вели дека го посакува Челзи во финалето од Лигата на Шампионите.
 
"Луѓето не можат да разберат колку многу ги сакам Интер и Челзи, колку ги сакам момците и колку им посакувам добро".
 
"Знам дека доколку играм против нив во четвртфиналето, полуфиналето или финалето, тие ќе бидат одличен противник".
 
"Синоќа беше тажен ден бидејќи Интер загуби во последната минута".
 
"Среќен сум за фудбалерите на Челзи бидејќи тие имаат неверојатен карактер".
 
"Имаа тежок период, но сега доаѓаат убавите моменти. Би сакал да играме против нив во финалето".