Лига на Шампиони | Тренерот на Наполи, Валтер Мацари и покрај елиминацијата од Лигата на Шампионите е горд на своите фудбалери...

Наполи не успеа да ја сочува предноста од првиот натпревар и доживеа елиминација од Лигата на Шампионите.
 
Но фудбалерите и навивачите на Наполи можат да бидат горди, ја поминаа групата на смртта и беа на чекор до пласман во 1/4 финалето, сепак загубија од поискусниот Челзи.
 
Валтер Мацари е разочаран од поразот, но и горд на своите играчи.
 
"Се разбира, ова е големо разочарување за нас, особено поради начинот на кој загубивме. Но задоволен сум од перформансите на мојот тим севкупно во Лигата на Шампионите, ова беше големо достигнување".
 
"Го плативме данокот на неискуство на овој натпревар, многу работи се одвиваа погрешно, но имаме млад тим и можеме да учиме од искуството".
 
"Челзи не прима често голови на домашен терен, но ние им дадовме еден а можевме и уште еден-два. Веројатно на овој натпревар имавме повеќе шанси отколку на првиот кога постигнавме повеќе голови".
 
"Загубивме клучен играч како Маџо, тоа беше голем удар за нас, подоцна примивме гол по центаршут од позицијата на која играше тој".
 
"Челзи одигра добро и заслужено ги постигна головите, но и ние заслуживме да постигнеме повеќе погодоци".
 
"Нашите напаѓачи секогаш работат напорно за тимот, мислам дека ни недостасуваше само искуство на ова ниво, да бидеме посмирени пред голот какви што сме на помалку значајните натпревари. Нашите фудбалери сеуште се млади и тоа е нормално".
 
"Челзи беше многу добар, многу попрецизен од нас и оди понатаму. Но јас сум горд на моите фудбалери. Дефанзивно требаше да одиграме повнимателно, но игравме против тим полн со шампиони".
 
"Сепак, Наполи треба да биде горд".