Англија | Арсенал потврди дека Томаш Росицки стави потпис на нов договор со клубот, чешкиот фудбалер не го крие задоволството од продолжувањето на верноста со Топџиите...

Медиумите во Англија пишуваа дека Росицки ќе стави потпис на нов две годишен договор со Арсенал, клубот од Северен Лондон утринава потврди дека постигнале согласност со фудбалерот за продолжување на соработката.
 
Актуелниот договор на Росицки кој игра во одлична форма, траеше до крајот на оваа сезона, но тој и во иднина ќе го носи црвено белиот дрес.
 
"Големо е задоволството од потпишувањето на нов договор со Арсенал, го сакам клубот и горд сум што го носам дресот на Арсенал" - изјави Росицки за официјалниот сајт на клубот.
 
"Дојдов тука пред шест години и сега се чувствувам како дома, не можам да бидам посреќен во моментов, ја продолжувам мојата иднина со клубот".
 
"Менаџерот, моите соиграчи, стручниот штаб и навивачите, сите ја одработуваат својата улога во креирањето на овој голем клуб, и се чувствувам привилигиран што сум дел од тоа".
 
"Верувам дека имаме навистина талентирана група на фудбалери, и заедно со менаџерот, иднината изгледа светло".
 
"Мојата цел секогаш била да освојувам трофеи со Арсенал, и ќе се борам со сите сили да ги остварам моите соништа".
 
Задоволството од продолжувањето на соработката не го криеше ниту Арсен Венгер.
 
"Секогаш сум бил голем фан на квалитетите на Томаш и среќен сум што тој одбра да ја продолжи иднината во клубот" - изјави Венгер.
 
"Верувам дека тој е еден исклучителен фудбалер, природен фудбалер кој технички е oд врвна класа".
 
"Тој игра во стил каков што практикуваме ние и комплетно ја дели нашата филозофија. Тој секогаш е подготвен да работи за клубот, секогаш го става тимот на прво место. Имам голема почит за него".