Македонија | Македонската фудбалска репрезентација не престанува да паѓа, стануваме немоќни и против репрезентации од калиброт на Луксембург...

Разочарувањето не го криешe ни Горан Пандев, капитенот вели дека време е фудбалерите да се погледнат во очи, да го испотат дресот на репрезентацијата или да го отстапат на помладите.
 
"Иако игравме слабо сепак имавме доста шанси кои за жал не успеавме да ги реализираме. Срам ми е и жал пред се што си дозволивме вака наивен пораз во последните секунди од мечот" - изјави Пандев за официјалната страна на ФФМ.
 
"Желбата во финишот за победа беше преголема така што сите се најдовме пред голот на домаќинот но заборавивме на одбраната. Селекторот Тошак направи се во овие неколку дена да не мотивира, да ни ја наметна замислената тактика но од тоа ништо не профункционира на теренот".
 
"Мислам дека е време овојпат одговорноста да ја превземеме ние играчите.Треба да седнеме, да се погледнеме во очи и да разјасниме сите заедно што значи да се игра за националните бои. Селектори, за време на играњето на оваа генерација се сменија многу, ние сме истите, значи кај нас нешто не е во ред".
 
"И јас како капитен сум подготвен да превземам дел од одговорноста. Знам дека притисокот од јавноста ќе биде голем во наредните денови, но ние како професионалци сме навикнати на тоа бидејќи и поразите се дел од фудбалот иако место за оправдување има се помалку".
 
"Очекувам сите играчи да ги прифатат добронамерните критики и да превземат одговорност за овој срамен резултат и во иднина чесно да го испотиме дресот кој е привилегија и за кој сонуваат многу фудбалери во Македонија, во спротивно да им го отстапиме местото на помладите и поамбициозните".