Франција | Според пишувањата на мадридски AS, ПСЖ посакува да го ангажира плејмејкерот на Барселона, Чави и за таа цел клубот од Париз е подготвен да плати фантастични 80 милиони евра...

Денешното издание на AS пишува дека 32 годишниот Чави има понуда за заминување од Камп Ноу по крајот на сезоната.

Весникот вели дека претставници на ПСЖ неодамна стапиле во контакт со шпанскиот репрезентативец и му соопштиле дека тие се подготвени да потрошат мало богатство за негов ангажман.

Со оглед на тоа дека ПСЖ минатото лето премина во рацете на конзорциум од Катар, парите не се проблем за ’Светците’, па се говори дека тие ќе ја активираат откупната клаузула во договорот на Чави вредна 80 милиони евра.

Чави во 2010 стави потпис на нов договор со Барселона со трајност до 2014, но и опција истиот да биде продолжен до 2016, и тогаш се веруваше дека со овој договор фудбалерот до крај на кариерата ќе го носи дресот на Барселона.

Останува да се види дали плејмејкерот ќе биде верен на клубот каде што ја помина целата своја кариера, или пак ќе ја прифати богатата понуда на ПСЖ и ќе се пресели на Паркот на Принцовите.