Евро 2012 | Привремениот селектор на Англија, Стујарт Пирс вели дека е подготвен да ги предводи ’Трите Лава’ на Европското Првенство во Полска и Украина...

По оставката што си ја поднесе Фабио Капело, Фудбалската Асоцијација на Англија одлучи неговиот асистент Стујарт Пирс да го предводи националниот фудбалски тим на привремена основа и да биде на селекторското столче на пријателскиот натпревар со Холандија.

ФА најави дека добро ќе ги разгледа сите опции, а медиумите силно шпекулираат дека Хари Реднап ќе биде новиот селектор на Англија.

Сепак, Реднап сака во овој момент да се фокусира само на Тотенхем, а покрај тоа, ФА сеуште не стапила во контакт со менаџерот на ’Спарси’.

Доколку првите луѓе на ФА не можат да пронајдат соодветна замена за Фабио Капело, Стујарт Пирс вели дека е подготвен да ја предводи Англија на ЕВРО 2012.

Пирс, кој е селекторот на репрезентацијата до 21 година, на денешната прес-конференција на Вембли во пресрет на пријателскиот натпревар со ’Лалињата’, рече: “Немам идеја дали ќе ја предводам Англија на Европското Првенство.“

“Но бев инволвиран со сениорскиот тим во изминатите четири години, и сум на располагање.“

“Имам искуство од големо натпреварување, и подготвен сум да помогнам доколку ФА тоа го побара.“

“Доколку е потребно летоска да ја предводам репрезентацијата на Англија, ќе го сторам тоа со задоволство.“