Англија | Хари Реднап вели дека е поласкан поради тоа што луѓето го гледаат како фаворит за наследник на Фабио Капело на селекторското место на Англија...

Менаџерот на Тотенхем исто така потврди дека добро ќе размисли за можноста да биде селектор на ’Трите Лава’ но додава дека мали се шансите во исто време да ги предводи Спарси и Англија.

Откако Фабио Капело си поднесе оставка, Хари Реднап беше посочен како фаворит за нов селектор на Англија, а поддршка на стратегот му дадоа голем број на фудбалери и менаџери од Премиерлигата.

“Секако дека е убаво кога луѓето велат дека јас сум фаворит за селекторското столче на Англија.” – рече Реднап. “Поласкан сум од тоа, ќе лажам доколку го зборувам спротивното.”

“Некои менаџери исто така кажаа убави работи за мене, и јас го ценам тоа.”

“Очигледно е дека ќе треба добро да размислам, но никој не стапил во контакт со мене.”

“Но ќе биде тешко, фукусиран сум на Тотенхем, клубот одлично се однесува со мене. Работите не можат да се одвиваат подобро. Ми се допаѓа секоја помината минута тука, имаме одлични фудбалери, одличен тим, и не можам да бидам посреќен.”

Некои извештаи говорат дека Реднап во следниот период би можел да ги предводи и Тотенхем и Англија, а по крајот на ЕВРО 2012 да се врати на Вајт Харт Лејн.

“Многу е тешко да се извршуваат овие две работи одеднаш. Доволно е тешко да се менаџира само клуб од Премиерлигата, камо ли и репрезентација. Се работи се две тешки работи, и треба да се фокусирате само на една.”

“Не можам да го тргнам фокусот од Тотенхем во овој момент бидејќи се обидуваме да се избориме за место кое носи настап во Лигата на Шампионите, а сеуште сме во игра и во ФА Купот.”

“Нема да биде фер доколку се насочам кон друга работа.”