Според последните информации од Србија, Црвена Ѕвезда ги започнала преговорите со Јавор за трансфер на Никола Јакимовски...

Минатиот месец се појавија гласини дека Црвена Ѕвезда се интересира за македонскиот фудбалер кој го носи дресот на Јавор, Никола Јакимовски.
 
Сега српските медиуми информираат дека Црвена Ѕвезда ги започнала преговорите со Јавор за трансфер на 21-годишниот македонски фудбалер.
 
Според Спортски Журнал, Црвена Ѕвезда направила конкретни чекори за ангажман на Јакимовски и големи се шансите дека тој уште во јануари ќе го облече дресот на славниот српски клуб.
 
"Уште од мал сум фан на Црвена Ѕвезда и се разбира, како и кај многу други фудбалери, голема е желбата кај мене да го облечам дресот на престижниот клуб" - изјави Јакимовски за Спортски Журнал.
 
"Имаше индикации дека Црвено-белите се интересираат за мене и ги следат моите игри, но оставам мојот менаџер да се грижи за тоа".
 
"До јуни сум фудбалер на Јавор и ќе ја почитувам секоја одлука на клубот".
 
"Имам обврска кон Јавор кој одлучи да потпише со мене изминатото лето по еден неуспешен трансфер во Шведска. Се ќе биде јасно за неколку дена".
 
Никола Јакимовски е офанзивен фудбалер кој може да игра во средниот ред но и како напаѓач.
 
Тој кариерата ја започна во Македонија Ѓорче Петров од каде се пресели во Ференцварош од Унгарија. Откако не ја доби посакуваната минутажа во унгарскиот клуб, реши да се врати во Македонија и минатата сезона го носеше дресот на Тетекс, а во летниот преоден рок стави потпис на едногодишен договор со Јавор.
 
Со добрите настапи во Јавор го привлече вниманието на Црвена Ѕвезда која поради лошите резултати подготвува играчки ремонт.
 
Никола Јакимовски е член и на македонската репрезентација до 21 година.
 
Повеќе информации за македонскиот фудбал на macedonianfootball.com.

Powered by: 24 FUDBAL.com.mk