Манчестер Сити стигна до мининална победа од 1-0 во дуелот со Арсенал, и остана на лидерската позиција во Премиерлигата...
Манчестер Јунајтед неколку часа беше на првата позиција и пред својот градски ривал, откако попладнево ’Црвените Ѓаволи’ победија со 2-0 на гостувањето кај КПР.
Вејн Руни уште во првата минута од средбата на Лофтус Роуд, по асистенција на Антонио Валенсија ги донесе гостите во водство од 1-0.
Натпреварот беше решен во второто полувреме, кога Мајкл Керик украде една топка од Џои Бартон, претрча околу 50 метри и од врвот на шеснаесетникот упати прецизен удар за водство на Манчестер Јунајтед од 2-0.
Но вечерва, Манчестер Сити пред своите фанови славеше со 1-0 во дерби пресметката со Арсенал, па ’Ѓраѓаните’ се вратија на лидерската позиција на табелата.
Двете екипи играа отворен фудбал, па средбата на Етихад Стадионот беше мошне возбудлива.
Во првото полувреме добри шанси за погодок имаа Серхио Агуеро и Марио Балотели а на спротивната страна Жервињо можеше на Арсенал да му донесе водство.
Резултатот беше отворен во 53. минута. Насри упати одлична длабочинска топка за Балотели, кој продре во шеснесетникот и биеше силно, а Шчезни само кратко ја изби топката. Дефанзивците на Арсенал не успеаа да ја расчистат топката, па Силва од неколку метри со глава ја затресе мрежата на ’Топџиите’.
Домакините потоа имаа уште неколку прилики за втор погодок, но избраниците на Роберто Манчини не можеа одново да го најдат патот до мрежата на Арсенал.
Во финишот од средбата тоа можеше скапо да ги чини, но Џо Харт беше присебен и успеа да го одбрани силниот удар на Вермален.
Дефанзивецот на Арсенал во судиското продолжение се закани уште еднаш, но неговиот удар заврши неколку сантиметри покрај стативата.
Тотенхем го искористи киксот на Челзи за одново да се врати на третата позиција. ’Спарси’ потешко од очекувањата, пред своите фанови, стигнаа до минимална победа од 1-0 над Сандерленд.
Стрелец на единствениот погодок беше Роман Павличенко во 61. минута, откако рускиот репрезентативец доби одлична топка од Рафаел ван дер Варт.
Ливерпул продолжи да се искачува на табелата, по лесната победа на гостувањето кај Астон Вила.
Средбата беше решена за само четири минути, откако најпрво Крек Белами најдобро се снајде во една мешаница и го отвори резултатот во 11. минута, а Мартин Шкртел во 15. минута беше највисок во скокот по корнерот од левата страна и зголеми на 2-0.
Powered by: 24 FUDBAL.com.mk
