Селекторот на македонската репрезентација, Џон Тошак како и целиот фудбалски свет е шокиран од веста за смртта на неговиот сонародник Гери Спид.
"Како и целиот фудбалски свет и јас бев занемен од вестa за смртта на Гери Спид, селекторот на фудбалската репрезентација на Велс. Ги испраќам моите сочуства и симпатии кон фамилијата на Гери Спид, Фудбалската асоцијација на Велс како и целокупната фудбалска јавност" - стои во соопштението на Џон Тошак.
"Јас заедно со претседателот и генералниот секретар на ФФМ, како и Гери Спид бевме присутни на состанокот во Брисел за договор за распоредот на натпреварите од нашата група и имавме многу добра и конструктивна соработка за време на истиот. За време на ручекот, по состанокот долго разговаравме за состојбата и перспективите во велшката репрезентација и морам да кажам дека не видов никаков знак кој би навестил ваков развој на настаните. Бев многу шокиран кога дознав за неговата трагична смрт".
"Гери Спид никогаш не играл за мене, ниту во клуб ниту во репрезентацијата на Велс, но морам да кажам дека неговата фудбалска кариера е извонредна а неговата тренерска допрва требаше да биде таква. Ова е многу голема загуба најнапред за неговото семејство, потоа за Фудбалската асоцијација на Велс како и за неговите фанови".
"Уште еднаш ги изразувам моите најдлабоки симпатии и сочуства кон неговата фамилија, ФА на Велс и неговите навивачи".
Powered by: 24 FUDBAL.com.mk
Powered by: 24 FUDBAL.com.mk
