Поранешниот генерален директор на Јувентус, Лучијано Моџи доби затворска казна од пет години и четири месеци поради спортска измама и инволвираност во Калчополи...
Денеска судот во Неапол ги соопшти казните во цивилниот процес кој се водеше против лицата инволвирани во Калчополи скандалот од 2006.
Вечерва, околу 8 часот, судијката Тереза Касорија ги прочита казните, а најлошо помина поранешниот генерален директор на Јувентус, Лучијано Моџи, кој е осуден на затворска казна од 5 години и четири месеци.
Поранешните комесари за делегирање на судии, Паоло Бергамо и Пиерлуиџи Паирето се осудени на 3 години и осум месеци, односно на 1 година и единаесет месеци.
Екс-судијата Масимо Де Сантис исто така е прогласен за виновен и доби казна затвор од 1 година и 11 месеци.
Затворска казна од 1 година и три месеци добија и сопствениците на Фиорентина, Андреа Дела Вале и Диего Дела Вале како и сопственикот на Лацио, Клаудио Лотито.
Судот во следните 90 дена ќе ги објави причините за донесените пресуди, а адвокатскиот тим на Моџи веќе најави дека тие ќе поднесат жалба.
И покрај ваквите пресуди, ниту едно од инволвираните лица нема да замине ’зад решетки’ бидејќи ова е само прв степен од правниот систем и ќе бидат поднесени жалби на уште неколку повисоки нивоа.
Powered by: 24 FUDBAL.com.mk
