Англија | Фудбалската Асоцијација на Англија покрена обвинение против Челзи поради непристојното однесување на фудбалерите на средбата против КПР...

ФА исто така побара од Андре Вилаш Боаш да даде објаснување за коментарите упатени на адреса на судијата Крис Фој и неговите асистенти.
 
’Сините’ загубија со 1-0 на гостувањето кај КПР а средбата ја завршија со 9 фудбалери. Жозе Босингва беше првиот фудбалер на кого Крис Фој му покажа црвен картон.
 
Во 33та минута десниот бек на Челзи беше во дуел со Шон Рајт Филипс и иако се чини дека фудбалерот на КПР прелесно падна на тревата, судијата без двоумење му покажа директен црвен картон на Босингва.
 
Во тој момент голем број на фудбалери го обиколија судијата Крис Фој и затоа ФА сега покрена обвинение против Челзи.
 
“ФА денеска покрена обвинение против Челзи поради неуспехот на клубот да осигура дека неговите фудбалери се однесуваат на пристоен начин.” – гласеше соопштението на ФА.
 
По крајот на средбата, Андре Вилаш Боаш упати остри критики кон Крис Фој и неговите асистенти па ФА побара од менаџерот на Челзи да даде објаснување за коментарите.
 
“Додатно, ФА му пиша на менаџерот на Челзи, Андре Вилаш Боаш и побара од него да даде објаснување за коментарите упатени на адреса на судијата Крис Фој и неговите асистенти.”
 
По двете обвиненија, Челзи има рок да одговори до петок 28ми октомври.

Powered by: 24 FUDBAL.com.mk