Манчестер Сити со неверојатни 6-1 го торпедираше Манчестер Јунајтед на Олд Трафорд, англискиот шампион понижен на свој терен...

Неверојатен натпревар на Олд Трафорд, Манчестер Јунајтед - Манчестер Сити 1-6!!! Шокантен пораз за англискиот шампион.
 
Историски ден за синиот дел од Манчестер, прегазен е лутиот градски ривал и тоа на Олд Трафорд.
 
Манчестер Јунајтед во овој дуел влезе со фантастична серија од 25 натпревари без пораз на свој терен, серија која денес беше прекината на начин кој никој не можеше да го замисли.
 
Серијата почна во 22. минута, Милнер додаде до Балотели кој убаво пласираше во долниот агол од голот на Де Геа, водство за Сити од 1-0.
 
Само што започна вториот дел, Манчестер Јунајтед остана со фудбалер помалку, Џони Еванс доби директен црвен картон откако го фаулираше Балотели кој сам излегуваше пред Де Геа.
 
Во 60. минута прекрасна акција на Сити која заврши со нов гол на Балотели за предност од 2-0.
 
Девет минути подоцна и трет гол на Сити, повторно убава акција на гостите овој пат реализатор Кун Агуеро.
 
На десет минути пред крајот Дарен Флечер постигнува гол и ја намалува предноста на Сити на 3-1.
 
Во самата завршница вистински шок за домаќините, во 90. минута Џеко по асистенција од Лескот погодува за 4-1.
 
Течеше судиското продолжение кога Силва зголеми на 5-1, и кога се чинеше дека ќе биде крај на голеадата во мрежата на Де Геа, нов гол постигна Џеко за конечни 6-1 за Манчестер Сити.
 
Со оваа победа Манчестер Сити се зацврсти на чело на табелата со пет бода предност пред Манчестер Јунајтед.
 
Арсенал со 3-1 го победи Стоук на Емирати Стадионот, повторно Ван Перси во главната улога.
 
Жервињо му донесе предност на Арсенал во 27. минута, седум минути подоцна Крауч израмни на 1-1.
 
Во 73. минута Ван Перси ја враќа предноста на Арсенал, Холанѓанецот во 82. ги постави и конечните 3-1.
 
Со идентичен резултат победи и Евертон на гостувањето кај Фулам.
Дренте по три минути игра донесе водство за Карамелите, Руиз Гонзалес во 68. минута го израмни резултатот.
 
Саха и Родвел погодија во 90. минута за победа на Евертон од 3-1.