Лига Европа 65-годишниот тренер на Лацио смета дека поразот од 1-2 од Спортинг Лисабон не ја одразува реалната слика од мечот кој според него, требало да зарши барем со нерешен резултат...

На гостувањето во Португалија, Лацио беше поразен од Спортинг Лисабон со 2-1. Победата на домаќините беше навестена уште во 21-минута преку Волфсвинкел но Мирослав Клосе во 40-та се погрижи за израмнување на резултатот. Сепак, во судиското надополнување пред паузата меѓу двете полувремиња, Емилиано Инсуа ги постави конечните 2-1.

Ваквиот епилог на настаните, за Еду Реја е неприфатлив. Според него, Лацио заслужи барем еден бод од ова тешко гостување.

„Имавме многу добар почеток во кој нашите напаѓачи креираа многу шанси. Но, ги пропуштивме шансите а и имаше недосуден пенал во наша полза. Заслуживме барем реми“- вели Реја.

Она што најмногу го изреволтирало сепак е фактот што во второто полувреме, „лацијалите“ беа со играч повеќе на теренот откако стрелецот на вториот гол за Спортинг, Инсуа заработи втор жолт картон.

„Нашите играчи не веруваа дека можат да победат, атмосферата во соблекувалната беше разочарувачка. Можеби затоа загубивме иако имавме фудбалер повеќе на теренот.“

По овој натпревар, Лацио кој се наоѓа во групата „Д“ е на 4-та позиција со само еден освоен бод, додека Спортинг е на челното место со максимален учинок од 6 бодови по две одиграни кола.

Powered by: 24 FUDBAL.com.mk