Пред почетокот на Олимписките игри во Лондон, целиот свет се смее на службената фотографија на "најзлатниот" олимпиец на сите времиња, Мајкл Фелпс...

Сите спортисти кои ќе земат учество на Игрите мораат да се фотографираат за службените брошури и интернет страницата, а меѓу нив и Фелпс, освојувач на вкупно 14 олимписки златни медали.

Резултатот од фотографирањето можеби најдобро го опишува саркастичниот коментар на американскиот портал "Bleacher Report".

"Изгледа дека олимписките ѕвезди и криминалците имаат една заедничка работа. Ужасни фотографии", пишува порталот.

На службената фотографија пливачот е со разбушавена коса, неизбричен и смртно сериозен.

Кога видел како излегол на фотографијата и самиот не можел да се воздржи, a да не се насмее.

"Тоа е жешка фотографија! Искрено, кога ја видов помислив дека нема да ме пуштат во Олимпиското село", низ смеа рекол Фелпс.

"Ме фотографираа по попладневната дремка. Затоа косата "ми бега" на сите страни. А сериозен сум затоа што ми рекоа дека според новите правила, на фотографијата не смеат да ми се видат забите", рекол во своја одбрана Фелпс.