Поранешната девојка на италијанскиот фудбалски репрезентативец Марио Балотели, Рафаела Фико, во интервју за италијанскиот магазин “Chi” откри дека очекува бебе од напаѓачот на “азурите”...

„Му се јавив на Марио, малку пред полуфиналниот натпревар против Германија, и му реков – Се сеќаваш ли кога сонувавме да станеме родители? Епа, тој сон се остварува“, раскажала италијанската телевизиска старлета.

„Прво молчеше некое време, а потоа ми рече – Ми ги кажа најдобрите вести кои некогаш сум ги слушнал! После ова тој ги постигна двата гола за влез во финалето на ЕУРО 2012“, додала Рафаела.

Ова за италијанските медиуми е голема вест, со оглед на тоа што двојката не е повеќе заедно. Тие раскинале на крајот од април, а само еден месец потоа дознала дека е трудна.

„Им кажав само на мајка ми и брат ми. Тогаш Марио не сакаше ни да ме слушне. Беше тоа избор кој немаше врска со нашата љубов. Знам дека се уште ме сака, како и јас него. Во моментов се обидуваме да ја обновиме нашата врска“, заклучила Рафаела.