Во Велика Британија е откриена досега непозната слика на големиот италијански мајстор на барокната уметност, Микеланџело Мерици да Караваџо...

Станува збор за слика на свети Августин од 1600 година која е пронајдена во една приватна колекција.

Познат по тоа што со своите иновации имал пресудно влијание на западното сликарство, Караваџо (1571-1610) зад себе оставил се на се педесет дела.

Професионалците тврдат дека уште едно негово, досега непознато дело, неодамна е пронајдено во една приватна колекција во Велика Британија.

Сликата на која е прикажан свети Августин - настаната околу 1600 година, кога Караваџо имал 28 години, ќе се појави за прв пат во книгата посветена на уметникот во издание на универзитетот Јејл.

Себастијан Шуце, професор по историја на уметноста на Виенскиот универзитет и еден од авторите на книгата смета дека станува збор за значајно откритие.

Сликата се вклопува во делата на Караваџо настанати околу 1600 година, кога неговиот стил бил скулптурен и монументален, со силни движења и изразувања. Се наоѓала во приватна колекција, а сопствениците верувале дека станува збор за дело на непознат сликар од 17 век.

Професионалците откриле дека сликата ја нарачал маркизот Винечцо Џустијани, еден од најмоќните заштитници на Караваџо во Рим. Имено, во инвертарот на овој банкар и страствен колекционер на уметност, се наоѓа слика од свети Августин со слични димензии.

Караваџо во 1610 година умрел на 38 годишна возраст, под нерасчистени околности во италијанскиот град Порто Ерколе. Се смета за најголем претставник на барокната школа во Италија и еден од најславните италијански уметници во светот.