Франција забрани споменување на фејсбук и твитер на телевизиските и радио програмите, освен кога самите мрежи не се теми на новинарските извештаи...

Француската регулаторна агенција за медиуми забрани споменување на социјалните мрежи фејсбук и твитер на телевизиските и радио станици, освен кога се теми на новинарските извештаи.

Одлуката се спроведува со повикување на законската регулација од 1992 година, според која употребата на овие сервиси на интернет претставува реклама.

Портпаролот на француската регулаторна агенција, Кристин Кели, објасни дека, со споменување на имињата на социјалните мрежи, на овие компании кои вредат повеќе милијарди долари им се дава предност во споредба со други слични сервиси кои се борат за место на интернетот.

„Споменувањето на овие мрежи претставува нарушување на конкуренцијата. Ако дозволиме споменување на твитер и фејсбук во етерот, тоа би ја отворило Пандорината кутија, и тогаш би ни се јавиле останатите социјални мрежи и би не прашале: А зошто не и ние?“, објасни таа.

Меѓутоа, познатиот француски блогер Метју Фрејзер оваа забрана ја објаснува со традиционалниот француски протекционизам кога е во прашање ширење на американската култура.

„Фејсбук и твитер се американски социјални мрежи и тие во Франција претставуваат симбол на англосаксонската доминација и го провоцираат вкоренетиот анимозитет во францускиот менталитет во однос на англосаксонската култура“, оценува Фрејзер.

Во Франција уште од 2003 година во комуникацијата помеѓу државните институции е забранета употребата на зборот e-mail.