Новиот авион на боливискиот претседател Ево Моралес Falcon  900EX, кој чини 37,8 милиони долари, засега останува на земјата, бидејќи во земјата нема доволно искусни пилоти, кои ќе го управуваат претседателскиот авион, објави министерот во претседателството Оскар Кока цитиран од весникот "La Patria".

Според десната рака на шефот на државата, осигурителната компанија поставува услов за пилотите, да имаат летано со овој авион најмалку 100 часа, а такви во држава немало.

"Неопходно е искусен пилот да ги контролира летовите на новиот авион. Во Боливија има искусни пилоти, но не и за овој авион, Falcon  900EX, а во оваа состојба компанијата не може да го осигури авионот". Оскар Кока додал дека се очекуваат кандидати кои одговараат на горенаведените услови, но не прецизирал кога и од каде можат да се појават такви пилоти.

Авионот беше донесен во Боливија на 2 јули и од тогаш е паркиран на воениот аеродром во Ел Алто, недалеку од главниот град Ла Паз.