Ал Каеда го лансираше своето прво онлајн пропагандно списание на англиски јазик, таканаречено "Inspire" (инспирација) кое вклучува неколку рубрики, една од нив е "Како да направиш бомба во кујната на мама".

Според многумина онлајн изданието на Ал Каеда ќе се обиде да ги собере фанатиците и активистите во САД и Европа. Онлајн списанието е раководено од огранок на групата во Јемен, за кои се тврди дека го организирале неуспешниот бомбашки напад на Божиќ.

Се верува дека од Ал Каеда го направиле овој потег, бидејќи воздушните напади на ЦИА го срушиле јадрото на организацијата, која постепено слабее.

"Јасно е дека ова ново списание има за цел да ги собере фанатиците  во САД и Велика Британија, каде што исто така може да има напади, слични на оние на Тајмс Сквер во Њујорк", рекол Брус Ридол, поранешен службеник на ЦИА.

Списанието на Ал Каеда е 67 страници, од кои можат да бидат прочитани само 3, бидејќи другите се кодирани.