Домаќинствата во Јапонија беа повикани да си легнуваат еден час порано од нормалното, за да помогнат во справувањето со климатските промени, пишува британскиот таблоид "Дејли телеграф".

Јапонската влада започна кампања, за да ги насочи луѓето да си легнуваат еден час порано и да стануваат еден час порано, со што ќе помогнат во ограничувањето на штетните емисии од јаглерод диоксид.

Кампањата "Утрински предизвик", претставена од страна на Министерството за Животна Средина се базира на предпоставките дека, замената на ноќната енергија со еден час сончева светлина може значително да ги намали последиците од глобалното затоплување.

Типично јапонско семејство може да ги намали емисиите со 85 килограми годишно, ако секој си легнува и станува еден час порано.

"Многу јапонци користат електрична енергија во текот на ноќта, гледајќи телевизија цела ноќ", рече портпаролот на министерството. Ова е последната иницијатива на јапонското Министерство за Животна Средина за борба против климатските промени.

Земјата има поставено за цел да ги намали емисиите од јаглерод диоксид за 25% од нивото во 1990 г. во рамките на следната деценија.