Полскиот претседател Лех Качињски и неговата сопруга Марија ќе бидат погребани во неделата во замокот Вавел во јужниот град Краков, објавија властите, цитирани од полската новинска агенција ПАП.

Криптата во катедралата на замокот е место на кое се закопани полски кралеви, како и таткото-основач на полската Република Јозеф Пилсудски, кој умира во 1935 година.

Претходно денеска, заменик началникот на канцеларијата на полскиот претседател Jaцек Сасин изјави за полското радио, дека погребното место е избрано од семејството на Качињски, но одби да открие конкретно каде се наоѓа.

Лех Качински и неговата сопруга, како и претставници на полската политичка и воена елита, загинаа во авионска несреќа во саботата во западниот руски град Смоленск. Телото на Качињски беше транспортирано дома во неделата, а десетици илјади, погодена од болка полски граѓани го поминаа патот од аеродромот до претседателската палата, за да се простат со нивниот водач.

Ковчегот со посмртните останки на неговата сопруга Марија пристигна во Полска денес, а ковчезите со телата на двајцата беа изложени за поклонување. Национална жалосна церемонија во чест на сите жртви на несреќата е предвидена за саботата во Варшава.