Најмалку 14 лица загинале, а повеќе од 100 биле повредени во силна експлозија од автомобил-бомба во близина на полициската станица во градот Мансури, соопштиле египетските власти утрово...



Експлозијата била толку силна што се срушил дел од четириспратна зграда, а голема штета им била нанесена и на околните згради, пренесуваат светските агенции.

Привремената египетска влада ги обвинила Муслиманските браќа за нападот, кои премиерот на земјата Хазем Беблави утрово ги прогласил за "терористичка организација".

Портпаролот на египетската влада Шериф Шавки изјавил дека Муслиманското братство го покажало "своето грдо лице на терористичка организација, со тоа што пролеа крв и ја загрози безбедноста на Египет", пишува египетската агенција MENA.

Се уште никој не ја преземал одговорноста за нападот минатата ноќ, кој се случува после еден ден откако милитантна група блиска до Ал Каеда ја повикала египетската полиција и војниците во пустина, или ќе ги убијат нивните борци.