При претрес на куќата на лидерот на грчката ултрадесничарска партија, „Златна зора“, Никос Михалолиакос, пронајдени се три огнени оружја, кои не се регистрирани...

Во склоп на истрага за членовите и симпатизерите на оваа политичка партија, досега се уапсени 19 лица, од вкупно 32, за кои е издаден налог за апсење, пишува грчката агенција АNА.

Двајцата заменици Елијас Панајотарос и Никос Михос доброволно и се предале на полицијата, а полицијата е во потрага по уште еден заменик на партијата, по име Христос Папас.

Според податоците од Врховниот суд, „Златна зора“ како организација е активна во Грција 26 години, од 1987 година.

Пристапот до канцелариите на „Златна зора“ во парламентот денес е блокиран со налог од шефот за безбедност.

Апсењата се извршени во рамки на сеопфатната полициска истрага после убиството на 34-годишниот хип-хоп музичар Павлос Фисас на 18-ти септември, за кое се товари дека го извршил поддржувач на „Златна зора“.

Политичката партија вчера се заканила дека ќе ја затресе политичката сцена во Грција, со што ќе им укаже на нивните пратеници да се повлечат од парламентот.

Златна зора на изборите минатата година освои 18 од вкупно 300 места во парламентот, за која многумина експерти велат дека е трета политичка сила во Грција.