Стотици деца во Албанија не присуствувале на почетокот на учебната година, затоа што се криеле дома поради крвна одмазда, која потекнува од неколку претходни генерации, соопштила албанската организација за помирување...



Марку Џин од организацијата соопштил дека вкупно 590 деца на возраст помеѓу 3 и 15 години нема да посетуваат настава, поради средновековната традиција, според која "крвта може да се одмазди само со крвопролевање", пишува АФП. Француската агенција објаснува дека според традицијата која датира од 15-ти век, сите машки членови на семејството може да бидат убиени вклучувајќи ги и новороденчињата, само затоа што некој член од нивното семејство убил член на другото семесјтво.

Бруталното правило е широко распространето во сиромашните планински области во северниот дел на Албанија, и во некои села и градови во другите делови на земјата.

„На повеќето од децата што остануваат дома им е оневозможено било каква комуникација и не можат да присуствуваат на настава поради изолација“, рекол Марку.

Албанските образовни власти минатата година започнале проект за домашно образование за сите деца што не посетуваат настава, поради страв дека ќе им наштети некој од дамнишните семејни непријатели.

Новоименуваната министерка за образование, Линдита Николија, изјавила дека владата ќе продолжи да им помага на овие ученици, но и дека нејзината цел е децата да излезат надвор и да можат да посетуваат настава како и сите други во училиштата.