Египетските воени хеликоптери ги нападнале позициите на исламистичките екстремисти на Синајскиот полуостров, два дена после нивните самоубиствени напади во кои загинале шест војници, соопштуваат безбедносни извори...



Мета на борбените хеликоптери "Апачи" биле засолништа и возила на екстремисти во близина на градот Шеик Зувајид, во северниот дел на Синајскиот Полуостров. Помалку познатата екстремистичка група "Борци на исламот", во средата изведеле напад во градот Рафа.

Групата ја обвинува египетската војска дека напаѓа "невооружени муслимани" во кампањата за да се потиснат исламските бунтовници во северниот дел на Синајскиот полуостров.

Екстремистите во Синај, од кои некои се поврзани со Ал Каеда, веќе со месеци ги напаѓаат египетските сили во областа каде граничи со појасот Газа и Израел.

Нападите се зачестени откако војската во јули го собори египетскиот претседател од власт, исламистот Мохамед Мурси.