Почина човекот што ја промени иднината на компјутерите, пронаоѓачот на глувчето Даглас Енгелбарт...



Изумителот на компјутерското глувче почина во вторникот вечер на 89-годишна возраст во Калифорнија, изјавила неговата најстара ќерка, Герда.

Својот момент на слава го доживеал многу рано во својата кариера, едно зимско попладне во 1968 година, кога држел презентација во Сан Франциско, каде претставил голем број на визионерски идеи, а децении подоцна ова предавање се сметало за „мајка на сите презентации“.

Зборувајќи пред илјадници водечки експерти, Енгелбарт, компјутерски научник од Истражувачкиот институт Стенфорд (SRI), тогаш претставил коцкаст уред со два ротирачки дискови наречен „индикатор со XY позиција за екран“. Тоа било првото компјутерско глувче.



Освен тоа, Енгелбарт тогаш ја одржал и првата видеоконференција, каде ја претставил теоријата за поврзување на страници со информации, врз основа на што подоцна ќе настане и „веб архитектура“.

SRI подоцна патентирал технологија за глувче и ја продал на Apple за 40.000 $. Првото компјутерско глувчето е пуштено во продажба со компјутерот Лиза 1983 година.